Moskva meri: Bir gündə paytaxta uçan 28 dron vurulub, "Domodedovo" hava limanı bağlanıb

Moskva meri Sergey Sobyanin noyabrın 2-də paytaxta doğru uçan dronların hava hücumundan müdafiə vasitələri ilə vurulduğunu yazıb. Onun verdiyi məlumata görə, əvvəl 18, sonra daha 10 dron vurulub, ümumi say 28-ə çatıb.

Sobyaninin sözlərinə görə, qəlpələrin düşdüyü yerdə fövqəladə xidmətlər işləyir. O, zərərçəkənlər barədə məlumat verməyib.

Rusiyanın Federal Hava Nəqliyyatı Agentliyi hava məkanından istifadəyə müvəqqəti məhdudiyyət tətbiq olunduğunu bildirib: "Domodedovo" bağlanıb, "Jukovski", "Vnukovo" və "Şeremetyevo" isə reysləri müvafiq qurumlarla razılaşdırmaqla qəbul edib və yola salıb.

Ukrayna prezidenti Volodimir Zelenski həmin gün Rusiya Ukrayna enerji sistemini vurmağı dayandırsa, onun neft emalı zavodlarına zərbə endirməyəcəklərini demişdi.