Zelenski: Rusiya ABŞ seçkilərinin diqqəti yayındıracağına ümid edib Ukraynaya yeni kütləvi zərbə hazırlayır

Ukrayna prezidenti Volodimir Zelenski noyabrın 2-də axşam müraciətində deyib ki, Rusiya Ukraynaya yeni kütləvi hücum hazırlayır və ilk növbədə enerji və logistika obyektləri təhlükə altındadır.

Onun sözlərinə görə, Moskva ABŞ-də keçiriləcək seçkilər zamanı dünyanın diqqətinin Ukraynadan yayınacağına ümid edir və hava hücumundan müdafiə sistemləri ilə "Patriot" raketlərinin çatışmazlığından istifadə etməyə çalışır. Zelenski Ukraynanın bu hücuma mütləq cavab verəcəyini deyib.

Ukrayna prezidenti bildirib ki, bu il Rusiya ordusu zərbə taktikasını dəyişib: hücumlar artıq təkcə elektrik enerjisi istehsal edən obyektlərə deyil, şəbəkələrə və paylanma sistemlərinə də yönəlir, bərpa edilən obyektlər yenidən vurulur, sutka ərzində onlarla zərbə endirilir. Zelenskinin fikrincə, zədələnmiş obyektlərin bərpa sürəti hava hücumundan müdafiə raketlərinin olması qədər vacibdir.

Zelenskinin verdiyi məlumata görə, noyabrın 2-də Zaporojye vilayətinin Komışuvaxa qəsəbəsində humanitar yardım paylanan məktəbə endirilən zərbələrdə ölənlərin sayı 26-ya çatıb, onların arasında Fövqəladə Hallar üzrə Dövlət Xidmətinin əməkdaşları da var. Əvvəl 24 nəfərin öldüyü bildirilmişdi.

Ukrayna lideri deyib ki, məktəbə ilk aviazərbədən sonra daha doqquz bomba atılıb və bu zərbələr insanların gizləndiyi sığınacağı hədəf alıb. O, Rusiyanın orada hər həftə yardım paylandığını bilməyə bilməyəcəyini iddia edib.