“New York Times”: ABŞ-nin maliyyə naziri İranın təhdidlərinə görə evindən hərbi bazaya köçüb
Skott Bessent, arxiv foto: ABŞ Maliyyə Nazirliyi, Public domain, Wikimedia CommonsABŞ-nin maliyyə naziri Skott Bessent Vaşinqtondakı evindən hərbi bazaya köçüb. Bu barədə “The New York Times” qəzeti məlumatlı mənbələrə istinadla yazıb. Bazanın adı açıqlanmayıb.
Qəzetin mənbələrinə görə, Bessent avqustdan bəri Tehranı maliyyə baxımından təcrid etməyə yönələn iqtisadi təzyiq kampaniyasına rəhbərlik edir. Bu rol onu İranın ən çox zərər vurmaq istədiyi Tramp administrasiyası rəsmilərindən birinə çevirib. Bununla belə, Bessentə qarşı təhdidlərin nə dərəcədə ciddi olduğu hələlik aydın deyil.
Maliyyə Nazirliyinin nümayəndəsi Bessentin “İran rejiminin təhdidləri ilə dayandırılmayacağını” və İran iqtisadiyyatına təzyiq kampaniyasını davam etdirəcəyini bildirib.
Xəbər ABŞ Ədliyyə Nazirliyinin İran adından fəaliyyət göstərdiyini iddia etdiyi üç nəfəri ABŞ və Avropada hücumlar planlaşdırmaqda ittiham etdiyi gün yayılıb. ABŞ dövlət katibi Marko Rubio isə bir gün əvvəl iqtisadi təzyiq nəticə verdiyi üçün Vaşinqtonun İrana zərbələri hələlik bərpa etmədiyini demişdi.


