Əli Kərimli üçün özəl gün

Arqument.Az "Qafqazinfo”ya istinadən xəbər verir ki, partiya sədri 51 yaşını qeyd edir.

Əli Kərimli 1965-ci il aprelin 28-də Saatlı rayonunun Azadkənd kəndində anadan olub. 1985-ci ildə hərbi xidməti başa vurduqdan sonra 1991-ci ildə Bakı Dövlət Universitetinin hüquq fakültəsini bitirib. Elə orada AXC-nin BDU-dakı şöbəsinin yaradıcılarından biri və sədri olub. 

Tələbəlik illərində demokratik islahatları dəstəkləyən "Yurd” ictimai birliyinin yaradıcılarından biri və onun rəhbəri olub. 1988-ci ildə "Yurd” ziyalıların dəstəyi ilə kommunist rejiminə etiraz olaraq tələbələrin Bakıda görüşünü təşkil edib. Bu görüş təhlükəsizlik xidmətlərinin xüsusi alayı ilə dağıdılıb. 1988-ci ilin noyabrında meydan mübarizəsinə başlayan tələbə hərəkatının liderlərindən olub. 

Əli Kərimli AXC Ali Məclisinin üzvü olub və AXC Ali Məclisi sədrinin müavini vəzifəsində işləyib. "Azadlıq” qəzetinin parlament müxbiri olub. 1991-ci ildə BDU-nu bitirkdən sonra orada hüquq üzrə bir müddət müəllim işləyib. 1992-ci ilin mayında Azərbaycan Respublikası Prezidenti Aparatının ərazi-idarəetmə və hakimiyyət orqanları ilə iş şöbəsinin müdiri, 1 may 1993-cü ildən isə Azərbaycan Respublikasının Dövlət katibi təyin olunub. 1993-cü ildə ölkədə baş verən 4 iyun qiyamından sonra hakimiyyət zor gücünə ələ keçirən qüvvələrə etiraz olaraq vəzifəsini təhvil verib. 

Əli Kərimli 1993-cü ildə 4 iyun hadisələrini rəsmi şəkildə qiyam kimi qiymətləndirən ilk dövlət nümayəndəsi olub. 1993-cü il iyunun 26-da istefa verərək Ordubad rayonunun Kələki kəndində yaşayan prezident Elçibəyin yanına gedib, oradan isə bir sıra Qərbi Avropa ölkələri və Amerika Birləşmiş Ştatlarına işgüzar səfərlərə çıxıb. 1994-cü ilin may ayından Bakı şəhərinə qayıdaraq AXC sədrinin siyasi məsələlər üzrə müavini işləyib. 1995-ci il noyabrın 12-də proporsional qaydada AXCP-dən Milli Məclisin üzvü seçilib. Əbülfəz Elçibəyin ölümündən sonra AXCP-nin sədri seçilib.

Ailəlidir, 3 övladı var.