Nobel Sülh Mükafatı Trampa yox Venesuela müxalifət lideri Mariya Korinaya verildi

Nobel Sülh Mükafatı Trampa yox Venesuela müxalifət liderinə verildi

Norveç Nobel Komitəsi Venesuela müxalifət lideri Mariya Korina Maçadonu bu ilin Sülh mükafatı laureatı elan edib. Komitə siyasətçini “sülhün cəsur və fədakar müdafiəçisi” kimi qiymətləndirərək, onun “qaranlıq günlərdə belə demokratiyanın alovunu qoruyub saxladığını” bildirib.

Qərarı Oslo şəhərində Norveç Nobel İnstitutunda çıxış edən Nobel Komitəsinin rəhbəri Corgen Vatne Fridnes açıqlayıb.

Builki seçim xüsusi diqqət mərkəzində idi. Çünki ABŞ prezidenti Donald Tramp Nobel mükafatı uğrunda həm açıq, həm də qapalı şəkildə intensiv kampaniya aparmışdı. O, özündən əvvəlki dörd prezidentin – o cümlədən Barak Obamanın – bu mükafatı almasına dəfələrlə həsədini gizlətməyib. Trampın sərt çıxışları Norveçdə narahatlıq yaradıb və bəzi dairələr onun 79 yaşında ən nüfuzlu beynəlxalq mükafatlardan birini ala bilmədiyi təqdirdə qisas tədbirlərinə əl atacağından ehtiyat ediblər.

Nobel Komitəsi bu il 338 namizəddən seçim edib – 244 fərd və 94 təşkilat. Ötən il mükafat Yaponiya nüvə bombası sağ qalanlarının hərəkatı Nihon Hidankyoya verilmişdi.

Sülh mükafatının əvvəlki qalibləri arasında Nelson Mandela, çinli hüquq müdafiəçisi Liu Syaobo, Avropa İttifaqı və Nüvə Silahlarının Ləğvi üzrə Beynəlxalq Kampaniya (ICAN) kimi şəxsiyyətlər və təşkilatlar var.