DTX-nın “Hürriyyət”in redaksiyasında əməliyyat keçirdiyi, baş redaktorun saxlanıldığı deyilir

Daha bir media qurumuna qarşı əməliyyat keçirilib, baş redaktor saxlanılıb

Bu gün, oktyabrın 30-da Dövlət Təhlükəsizliyi Xidməti (DTX) “Hürriyyət” qəzeti, eyniadlı “Hurriyyet.az” saytı və “Hurriyyet TV”nin redaksiyalarında əməliyyat keçirib, baş redaktor Vüqar Məmmədovu saxlayıb. Bu barədə Meydan TV məlumat yayıb.

Vüqar  Məmmədov Azərbaycan Demokrat Partiyasının sədri Sərdar Cəlaloğlunun qardaşıdır.

Hökumətyönlü saytların yazdığına görə, redaksiyalarda keçirilən axtarış zamanı kompüter və bəzi sənədlər götürülüb.

Ehtimal olunur ki, əməliyyat hazırda ev dustaqlığında olan Prezident Adminstrasiyasının keçmiş rəhbəri Ramiz Mehdiyevlə bağlıdır.

Ramiz Mehdiyev barəsində Səbail Rayon Məhkəməsi tərəfindən oktyabrın 14-dən 4 aylıq ev dustaqlığı qətimkan tədbiri seçilib.

Mehdiyev Cinayət Məcəlləsinin 278.1 (Azərbaycan Respublikasının Konstitusiyasına zidd olaraq hakimiyyətin zorla ələ keçirilməsinə, yaxud hakimiyyətin zorla saxlanılmasına, habelə dövlətin konstitusiya quruluşunun zorla dəyişdirilməsinə yönələn hərəkətlər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma, xeyli miqdarda) maddələri ilə ittiham edilir.